كتب : دكتور أحمد الخطيب
يا جماعة أرجوكم ،، أستحلفكم بالله ما تودوا عيالكم المدارس ولا الحضانات طول ماهما بيكحوا،،
بلاش ابنك يسخن ويعطس فتوديه عشان فاكراه برد عادى ،،
دلوقتى الرشح الخفيف بيقلب برد تقيل ،،
البرد التقيل بيقلب نزلات شعبية حاده ..
النزلات بتقلب التهابات رئوية ف ثوانى !
ولو بتروحى شغل ومش عارفه توديه فين حدى اجازة اضطرارية واقعدى في البيت صدقينى من ناحية أوفر والله انه يعدى زمايله في الفصل وبعدين هما ياخدوا الميكروب ويردوهاله الاسبوع اللى بعده دور اتقل وتصرفى الفلوس اللى مغيبتيش عشانها على كشف دكتور وعلاج !
– ومن ناحية أخلاقياً ودينياً حرام والله حرام لأنه لا ضرر ولا ضرار !
ثلاثة نصايح أرجوكم يلفوا الفيس كله انهارده ،، ايوا نقدر نقطع دورة حياة الفيروس المنتشر بإذن الله :
لو ابنك عنده العلامات دى يغيب فوراً عن المدرسه/الحضانة ،
كحة بتصحيه من النوم ، حرارة فوق ٣٨،٥ ، عطس ورشح مستمر ، ترجيع ولو مرة واحده ليلا ، أى طفح جلدى في الجسم او الشفاه او الفم ، أى تورم فى الغدد تحت الأذن(نكاف)
والغياب يكون اسبوع على الأقل – مفيش هزار .
اطفالنا اللى تعبانين في البيت – ب
جنيه نشترى mask قناع طبى للوجه الطفل اللى بدأ يكح يلبسه عشان ميعديش اخواته ودى مفهاش هزار او رفض حتى لو بالعافية ، لان البيت كله بيتعدى خلال ساعات والله ، نوزعهم على الاوض فوراً،، نشرب كوباية ينسون صبح وليل ، نمنع العاده المُجرِمة بتاعة بوس العيال من الفم فوراً ، الطفل يتعالج فوراً من الكحة قبل ما يعدى الباقى ، والله المستعان .
لما ابنك يبقا مش عارف ياخد نفسه وأنفه مسدوده ،، سلكيها فوراً ومتتأخريش ومتقوليش اصلى مش عارفه – الفيديو ف اول كومنت – لان البلغم بينزل على الصدر يبهدله حرفياً ،، بعد كده انزلى على الصدر ،، لو بيكح ابدأى اعشابك فوراً ، لو سمعتى صفارة أو نهجان او رفض رضاعه او كحة مش بتفصل اكشفى فوراً ،، عاوز اقول ان جهاز النيبولايز – البخار ،، لا غنى عنه حالياً فى معظم البيوت اللى اطفالها كحتهم مطولة – البديل مؤقتاً حلة ماء دافئ + معلقة تانتم اخضر ويستنشق البخار الطالع منها لمدة ١٠ دقايق – لغاية ما ربنا يسهل بالفرج من الادوار اللى مش بتخلص دى ..
يا رب نكون ساعدناكم ويا رب ننشر الكلام ده ويوصل لاولياء الامور والمدارس والحضانات لازم يساعدونا بالتوعية لان الموضوع زاد عن حده والله تقريبا ما فى بيت الا وفيه طفل بيكحّ ،، وتكلفة حجز الاطفال فى المستشفيات مكلفة جداً ومفيش اماكن في المستشفيات الحكومية …
#كفاية_كحة..
#اللهم_اشفِ_أطفالنا
