كتب : أمل النبوى
النهاردة كنت واقف مع شوية شباب من سنة اولى كلية .. كلمتين من هنا على تهريجتين من هنا .. الحوار اتقلب سياسة .. حاولت بقدر الامكان اسمع منهم ومتكلمش .. وهما نفسهم حاولو برضوا يعبروا ويطلعوا اللى جواهم .. كانوا عاوزين حد يسمعهم … بكل صراحة بعد حوالى ساعة كاملة من الانصات لهم .. اكتشفت ان جيلهم اكثر وعيا وثقافة وجراءة من جيلنا … جيلهم فاهم كويس جدا حقيقة الاوضاع .. ولكنه بيتظاهر باللا مبالاة عشان يريح نفسه من الصدام .. جيل وطنى بيعشق بلده برغم انه محبط وبيتمنى الهجرة حاليا ولكنه مستعد يضحى بحياته من اجل بلده بجد. اوعى حد يصدر لك الفكرة العبيطة ان شبابنا كسلان والسوريين كشفوهم وكل هري اللجان الاليكترونية ده … شبابنا هو اللى بنى الخليج كله وشغال نار فى اوربا وامريكا … وهما نفسهم بيشتغلوا جامد هنا فى مصر فى كل المؤسسات المحترمة زى البنوك والشركات الخاصة … (المشكلة مشكلة ادارة ونظام فقط .. لو مش مصدقنى قارن سلوك المصريين فى المترو اوالمطار وسلوكهم هما نفسهم بعد خروجهم من المترو اوالمطار) اقسم بالله انا متفائل بجد بجد جدا .. لان الاجيال الجاية واعية .. اجيال صعب يتضحك عليها تانى بشعارات دينية او وطنية … الاجيال دى حتشكل الكتلة الكبرى فى المجتمع خلال 20 سنة بالكتير .. للاسف سيرحل جيلنا تاركا لهم الوطن بشكل اسوأ مما استلمناه ممن قبلنا … لا يبزغ الفجر ابدا الا بعد اشد لحظات الليل ظلمة … ومصر دوما تمرض ولا تموت … مصر تشبه ذلك الطائر الاسطوري الذى يرتفع فجأة من الرماد ليصل لعنان السماء (الفينيكس) … تفاءلوا ان شاء الله.
