ليه يا صاحبى ….؟ ليه بشوفك كل مرة 

ليه بشوفك كل مرة
بألف وش ؟
ليه خصالك بجد مرة
خداع وغش ؟
ليه كلامك شهد صافى
بس فعلك
دود فى مش؟
كنت صاحب يوم قريب
كنت فاكرك ….
قلب طيب
كنت شايفك إيد تساعد
ضهر جامد
ما ينكسرش
كنت قارى اللى ف خيالك
كنت با حلم …
من خلالك
نفسى أعرف إيه جرالك
خلانى يوم منك أكش
الحكاية بينا غيرة ؟
ولا فى حاجات كتيرة
منها غل ومنها حيرة
أفكار كتيرة
متتفهمش!!!!
نقسى أعرف ليه يا صاحبى
لما أخلص يبقى ذنبى
إنى ألاقى فى يوم خداع
غدر صاحب كان صديق
فى لحظة واحدة لاقيته باع
رغم إخلاصى يجزينى
ويختفى من غير وداع
قولت يمكن فى ظروف
واجب أسأل أو أشوف
إلتقيتك بتحاربنى …
طعن غدرك كله صابنى
من غير خجل !!
من غير كسوف !!
ورغم طبعك الخسيس
لسه فاكر بنا عشرة
عشرة غالية ما تتنسيش
للأصيل حكمة وعبرة
ولا عندك ما تسويش
وصفتها يا غالى سكرة
فوقت منها بفعل قرش